مواقف حفرت في ذاكرتي

لما كنا أطفال في ( كي جي 2 ) كنا مشتركين في تاكسي ذهابا وإيابا ، ورغم أنه مر بي كثير من السائقين أثناء مراحل دراستي المختلفة إلا أن ( عمو دة ) أتذكره جيدا

لما كبرت عرفت أن السائقين عادة ما يكونوا ( مكشرين ) و ( مكلدمين ) و ( بيتخانقوا مع دبان وشهم ) و (سهل جدا يتجر شكلهم ) وأكيد اخر حاجة ممكن يعملوها انهم يلعبوا مع الاطفال اللي راكبين معاهم ، دة لولا الفلوس اللي بياخدوها من اهاليهم كان زمانهم نزلوهم عند اول محطة عشان يخلصوا من دوشتهم !!!

إلا ان ( عمو دة ) مش فاكرة عنه غير انه دايما كان بيضحك معانا ، وقتها - ومش عارفة ليه بالضبط - كان التاكسي بيكفي تقريبا 10 اطفال ، و محدش يسألني كنا بنقعد ازاي لاننا اكيد مكناش بنقف !!!

ورغم اننا اكيد كابسين على نفسه وضاغطين على كاوتشه ومفطيسين دريكسيونه واكيد مكنش عارف بيجيب اول وتاني من كتر الاطفال اللي شوية وهيقعدوا على رجليه

رغم كل دة كان طول الوقت بيهزر ويضحك معانا ، وفي الحقيقة انا مش فاكراله غير روحه الجميلة معانا ، دة انا حتى مش فاكرة اسمه !!!

وفي مرة واحنا راكبين معاه قاللنا انا هعملكم سحر او حاجة زي كدة ، قلنا ايه يا عمو ايه ؟؟

قاللنا هخلي العربية تمشي لوحدها !!!

قلناله مينفعش يا عمو لازم تمسك الدريكسيون ( طبعا وقتها كنا فاكرين ان السواقة ما هي الا دريكسيون يمين ودريكسيون شمال وبيب بيب بيب :) )

قاللنا : طيب اهو انا مش ماسك الدريكسيون ، طبعا استغربنا للقاع ، بس طبعا كل دة لمدة نص دقيقة مثلا عشان منروحش في داهية وناخد الرصيف بالحضن !!!

طبعا روحت حكيت لماما القصة المثيرة السحرية دي ، ماما ضحكت وقالتلي تلاقي رجليه كانت تحت دايسة على البنزين

تاني يوم طبعا اول ما ركبت ، قلت : عمو انت كنت دايس على الحاجات اللي تحت دي ، قاللي طب اهو وشال رجليه ، طبعا حسينا بقى بمزيج من الاحاسيس ؛ سحر دة بجد ولا ايه ، ولا هو عاملها ازاي ؟؟ وهيحصل ايه هنموت بقى ولا ايه ؟

وفضلت شايلة في قلبي اللغز العجيب دة وساكتة لغاية فييييييييييين فين بقى فيييييييين يعني ما كبرت بعدها ييجي 15 سنة كدة لما فهمت السواقة ، وعرفت انه كان ماشي بالقصور الذاتي !!!

طبعا انا طول الوقت دة مكنتش قادرة انسى الموقف وعزمت على حله واديني حليته :)

وارتحت .....

المهم بقى يا جماعة غير طبعا اني حليت اللغز ، هو الراجل الجميل الطيب دة ، اللي قدر يحفر موقف جميل في ذاكرتي بروحه الجميلة وبديهته اللي استخدمها معانا والفرحة اللي كان بيدخلها على قلوبنا وانه فهم ان برغم كل شئ ومشاكل وظروف ، مش ذنبنا ابدا كأطفال اننا نشوفها على وشه ، حقنا على كل حد بنقابله انه يفرحنا ويفهمنا ويحفر في قلوبنا مواقف جميلة تبقى معانا طول الزمان ، وندعيله بيها كمان

والى لقاء مع مواقف اخرى