حكاية حب

ريم بنت جميلة ورقيقة زي كتير منا ،
قلبها أقصد أرضها دايما محافظة عليها وبتنضفها أول بأول ومش بتزرع فيها الا أفضل الأنواع

وفي يوم من الأيام مرّ على أرضها -غصب عنها- واحد غريب
رمى بذرة على الأرض وبسرعة اختفى ، فدخلت البذرة جوا أرضها.
وشافت ريم اللي حصل ، لكن مارتاحتش للشاب دة وماطمنتش للبذرة اللي رماها ، واتوترت وماعرفتش تعمل ايه ، حاولت تدور على البذرة عشان تنزعها من أرضها لكن للأسف معرفتش
خافت ريم وحطت ايديها على خدها وفضلت تفكر : يا ترى أنا كدة خلاص مش هعرف أتخلص من البذرة دي ،وهتفضل جوا أرضي ؟؟؟ ويا ترى ممكن تعمل في أرضي ايه لو كبرت؟؟؟

وعلطول راحت للي دايما بتروحله أول ما بتقابلها مشكلة ، ماهي مالهاش غيره يحس بيها ويقف جنبها دايما مهما كبرت مشاكلها او صغرت ،ومايملش منها إلا إذا ملت منه ،وافتكرت ان "ومن يتق الله يجعل له مخرجا" ورفعت ايديها وقالتله: يارب أنا نفسي أحافظ على أرضي ،انت عارف اني بحاول أعمل اللي عليا ، لكن مقدرش أمنع الناس إنهم يمروا عليها ، فاحفظني واحفظ أرضي ، يارب ساعدني، اعمل ايه ؟؟

ولأن ربنا قريب أوي منها - ومنا كلنا- ألهمها بفكرة ، فقالت ريم : انا كدة كدة مش عارفة أطلع البذرة لأني لوحدي وضعيفة ، وفي نفس الوقت مقدرش اسيبها تكبر ، لأني معرفش البذرة دي هتطلع ايه ؟؟؟!
انا كل اللي اقدر اعمله دلوقتي اني مش اسقيها وأحاول أنساها وأهملها
ومرت الايام وفعلا البذرة ماكبرتش ولا كان ليها أي أثر ونسيتها ريم تماما ورجعت تزرع أرضها وتحافظ عليها أكتر من الأول ...
لأ لسا القصة مانتهتش

لغاية
ما جه يوم مر فيه شاب وشه منور بنور الله يمشي بخطى متأنية ، مر على أرض ريم ، فعجبته الأرض وحس إنها صالحة وتستاهل أنه يزرع فيها أهم بذرة في حياته ، فحط البذرة جوا أرض ريم ، بس المرادي استأذن ريم قبل ما يزرعها فوافقت ريم ، ووقفت جنبه تزرعها معاه.
وكل يوم يخرجوا يطمنوا عليها ويلاقوها بتكبر فيبصوا لبعض ويبتسموا بحب ويقولوا الحمد لله الذي هدانا لهذا وما كنا لنهتدي لولا ان هدانا الله ،
ولما أي ريح تحاول تزحزحها من أرضهم يحوطواعليها بسرعة ويحموها سوا ،
ولما آفات الزمن بتحاول تبوظها بيحطوا ايديهم في ايد بعض ويواجهوها بقوة بيستمدوها من حنانهم على بعض .
ويوم ورا اليوم بيزيد ترابطهم وقربهم من بعض
وكبرت بذرتهم قصدي شجرتهم وطرحت الشجرة أطفال جمال اوي ، وضلل حبهم عليهم وعلى ولادهم

يا أختي ياحبيبتي والله أنا حاسـة اوي بيا وبـيكي
مش أي إعجاب تزرعيه كدة في قلبك الله يخليكي
دة قلبك أغلى من كل حاجة عندك وكمان عينيكي
و بإيدك انتي ماتخليش أي حد يزرع حبه فيكي
هتعيشي مرة واحدةبس فاتق الله يكرمك وينجيكي
تكسبي دنيا وآخرة وتفرحي وتفرّحي أهلـك بيكي
هو واحد بس مكتوبلك ومش هيـهرب من ايديكي
فكري كويس واختاري طريقك لأنه زيّك هيجيكي
فاحسبيها صح وكوني له كفاطمة يكن كعليّ ليكي
واختاري ذا الدين يحبك ويكرمك ويخاف عليكي